ሸሂድ ሼኽ አህመድ አብዱላሂ ባሐርኩትዚታ ታሪኽዚዩቤ ጢጥቤ!(አላሁ የትራሃምለዩ)

ሸሂድ ሼኽ አህመድ አብዱላሂ ባሐርኩትዚታ ታሪኽዚዩቤ ጢጥቤ!(አላሁ የትራሃምለዩ)
–

ዚገደሩ አሊም ሼኽ አህመድ አብዱላሂ አውዚዩ አብዱላሂ መሐመድ አብዱራህማን ቤዋ አይዚዩ አሚና አህመድቤ ጌይቤ 1922 ዓ/ም
ተወለዱ።

ሼኽ አህመድ አብዱላሂ ኢልሚው መልመድ ዜገሎ ዊጅነትዚዩቤ ከቢር ዩሱፍ ሼኽ ቁራንጌይቤንታ። ወቅቲዞቤ ጣሊያን ሀርቢ ዚናረሌ
ባይቲ አብዛህ ቁርአንጌያች ተቆፈሉ። ወቅቲዞቤ ዘልቶፈላ ቁራንጌይ ከቢር አቡበከር ቁራንጌይ ናረማ አዞዴቤም መልመድ ኤገሉ
።አዞቤሔር ጌይ መድረሳ ተከፈታ ናርማ ሼኽ አህመድ ጌይ መድረሰቤ መልመድዚዩ ኤገሉ።ጌይ መድረሰቤ ጊዲር ጊዲር አሊማች ናሩ።
ሼኽ አባስ መሐመድ ፣ሼኽ መሐመድ ወዚር፣ሼኽ መሐመድ ሳሊህ ፣ሼኽ አብዱረህማን ኻያ ፣ ሼኽ አሊ ዋ በጂህ አሊማችቤ
ለመዱማ አዞዴቤዞ መትሌመድ ኤገሉ ።

ላኪን አኺርቤ ሀይለስላሴ ጌይ መድረሰቤ ዚናሩ አሊማቹው ኒስፊዚዩው አገዴዩ ወቀጠዩ ኒስፊዚዩው ባድቤ አጭዩ ።

ላኪን መድረሳው ሀይለስላሴ ኢስነሰአቤዩ ቤሄር ሼኽ አህመድ አብዱላሂ አዞዴቤዞ መትሌመድ ኤገሉ።ዛሊም ዚታ ሀይለስላሴ
ሁኩመሌ ሸጃእ ዚተዩ ሼኽ አህመድ አብዱላሂ ዪኩት

«መድረሳው ነሰኹቡናጊሩም ቀልቢናው አበደን መንሳእ ቲፈርኩሜኹ፣ ኢናቹው ገዘኹነጊር ቀልቢዚኛው ቲገዙሜኹ» ባዩ

አዞ ቤሄር ሼኽ አህመድ ጌይቤ ኪም ደደር ሃሩማ አዞዴቤ መትሌመድ ኤገሉ። አዞቤር ኪም ጌይ ጊረገቡማ መስጊድ ጁምአቤ
አዚዩቤቀድ ዚናሩ ከቢር አህመድ ላዚሙው ሄገኑማ መትሌመድ ኤገሉ። ሼኽ አህመድ አብዱላሂ 90አመት ኡምሪዚዩቤ ሰብኢን
አመት መትሌመድቤ ሁሉፍ አሹ።

ሼኽ አህመድ አብዱላሂ አሀድጊር ዘለትነፈሱቤ ሶዛ ሰላት ቤሔር መድረሳ የትሊምዳሉ ፣መኽሪብዋ ኢሻእ ማቤይነ መስጊድ ጁምአቤ
፣ ዚቀረ ወቅቲዚዩው ጋርዚዩቤ የትሊምዱ ናራ።

ሼኽ አህመድ አብዱላሂ ፣ሙሉእ ሐያትዚዩ አላሁ ኡገቤ ተድሂያ ዛሹ ፣ ዱኚት ራሃዜ ዘሌሬቄዩ ጊዲር አላሁ ጋፊ ናሩ።
አዱኚት ቁሻሽዜ ዘለሬቄዩ፣ አላሁ ሪደዞው መርኸብሌ 24 ሰአ ጀሚእ ኢለፋኽ ይሉ ናራ ” አላሁ ፋጮትዚዩ ኩት የርኺበዩ።

ሼኽ አህመድ አብዱላሂ አሐድ ኡሱእ ጠባዞ ዋ ሱምዞው አቁጊር ጉዶር ወቅቲ ቤሔር አዚዩዴ ዚሐራሳ ሱምዞቤ የሲኖሆል ። ሱብሃነላህ
ሼኽ አህመድ አብዱላሂ ኦርኩትዞም ወዱድ መኽነዚዩቤ ገልጌብ ዛሹሳ ፊርጊጭቲ በጂህ አኽላቅቤ ኡሱእ ጀሚእ ባህ መትካሃል
ዚፈረኩ ፣ ጢትቤ ኢላጊዲር ኡምሪ ደረጀቤ ዛል ጀሚእሌ ቁያስዞቤ ኢቆት የለምዱዛሉ ከቢር ኢንተዩ።

ሼኽ አህመድ አብዱላሂ ዲነል ኢስላምሌ ኢልሚ መትሌመድቤ በጂህ ሊፋኦትዋ አታጮት አኙ።ሼኽ አህመድ ጢጥዋ ጊዲርዞ ጀሚእ
ዩደዩ ናራ ሰበብዞም ሚን የቁምሲ አኽላቅ ዛለዩ አዞኩትዞም ሙስሊም ኡማ አሐድነትል ዛለዩ ሞውቂፍቤ ከምዞው ዛጡው ደድዋ
ጊድራ መግኘሌ ዚፈረኩ አሊም ኢንተዩ።

ሼኽ አህመድ አብዱላሂ አላሁ ዚሰጤዩ ዚዲን ኢቆቱው ኡምመቱው መትሌመድሌ አታጮትዚዩ ጊዲር ኢንታ።

ሙት ዘይቂር ኢንታ ኩሉዚኛም ፈረቃ ኪለንቆረርነ ኒነብራና ፣ ሼኽ አህመድ አብዱላሂ 7ቲ ቄሲ መንታ ዋፈቄዩማ ጁገል ሐኪም ጋርቤ
አፌት ኺድማ የገኝዛሉ ቀላህ ባዩመ ግንቦት 23/2012 ኢ ሂ ዛህጠና አመት ዚዩቤ ሂያ ዱኚትቤ ኪም አኺራ ገበኡ።

“ኢና ሊላህ ወኢና ኢሌይሂ ራጂኡን “

አሊም ዪሙቱሜል አሊም ሸሂድ ኢንታ ሼኽ አህመድ አብዱላሂ ሼሂድ ሸሂድ ኢንተዩ።

አዚዩው አላሁ ዲላገዚዩው የወደድለዩ ፣ጀነቱል ፊርዶውሲቤ የሼልመዩ ፣ጋራችዚዩው ፣ አህላችዚዩው ፣ተልሚዛች ዚዩዋ ጀሚእ ሀረሪ
ኡመትሌ ሰብሪዋ ኢማን የስጠና!