ህንቅርት ለኣይቤ አንገት አቅነእ
ኮሮና ነዙ ዘዲጀቤና ረዚን ሙት-ዳና ሰበብቤ ሺኢሽቲ አምሪ አውን ህትፋን ተስጤነመ ሀልና። ጋርቤ ተጌቡ፤ ቃምቤ ሮህቁ (2 ሜትር ሩህቃ)፤ ኢጂኾው ሳቡንቤ ሂጠቡ (ኢንኾው፤አፍኾ ዋ ኡውፍኾው አትኒካኩ)። ይ አሳስቤ ኮሮና ሚሻ ጋር ኣሼነመ ተኸተትናመ ሀልና። መኽተት ብላይ ዘንኡቃች፡ መትኸተት ዋፈቄና።
ኢላ መቺ ኒትኸተታና ይልዛል ህብሪው ወቅቲዞሌ ነህደጋመ ዛል ሃሉው ነጋርዲ በሉ! ጋርቤ መትጌበል ፤ ሶመን ወህሪ ሞኽነዞበህ፤ አሀድ ገረብዚናሌ ይ ኹንቲ ተሜቼና። ተርሃሀቁ አውን ቃምቤ ሮህቁ ይልዛል አላይዞበህ አርሃሀቄነ ግርዞዞ፤ አሀድ ጋር ኒገብዛናችሌ መትቂራረብ አለፍ ሰጤና። ማልቱ-ቄጭ ዋ ሚሼት-ቄጭ ድላጋ ሩሙድቲ ፤ ኸዚር ዋ ኢልያስ ያሸና ዝናርናችሌ፤ ፉስሐ ወቅቲ፤ መሳ መዋለ፤ መሳ መህደር ነሲብ ነገኚ ኩት ኣሼና። መድረሳም ቁፉል ሞኽነዞቤ ወልዳችበህ ፈህኒ ነገኚ ኩት ተምቻቸሌና። ፈህኒ ዋ ጀህጀህዞ ጎይተሌ ምስጋና የግበአ የቲሻል።
ዪ ይ ኩት ኢስታ አላይ ገረብደሌ አምሞ ጋርቤ ተጌቡ ይል አምሪ ኡሩስ ፍልጣ ዝኻነቤያች ሐሉ። ወልዲ በህ አውን ወልዳችበህ ሕደግ ዋ ሒጀጊ፤ ኡሽ ዋ አቱሽ ዶኻ ዋ ቀህሪ ዝገፈረቤያች ሐሉ። አዝዞ ኩትዞዞ ነዲዞም ጢት ሰበብ የትኺሸዩዛል ኢስ አሀድ አቦቻች ዋ ሚሽታችሌ ጋርቤ መዋለ፤ ነዙ ላይቤ ነዙ ኻነቤዩ። ዜገሎ ገልጌብ ዘልቲሔሰበቤ ሾርጠፍ ይሊጥመ ኽላፍ የትኺትላል። ቤቀድ ዝደረቃ ጡሉእ ይትነከኣል። ፈኽ ይላል። ፈኽፈኽ ይላል። ስናን ይፊህማል።
ደቺ፤ ቤቀድ ኩታ ዩኹኒ ግር፤ ጋርቤ ኢስወጠኦመ ሂራር ኢስአበረዶ። አኸእማኽ ኣይዴ የህሮ። “ጋርቤ ተጌቡ” ይል መንግስቲ አምሪ ኡጋው ጥል፡ መትራሐ አታያቹው ኦና ኣሼዩ። መሪኝ ወዩኽ ጌል ጋር ሞህራም ይትፈረኩሜል። ጋር ኡስጡ ክትቲ ክትቲ ዛየዳ። ኣይኸ ኡዙንዜ ዋ ኣይኸሽ ኡዙንዜ በዝሃ። ዛልነቤው ባድ ባሎት ኩተቤ “ጋር-ኡስጡ ሀውከር ወዩኽ ኢንዶች መቅጠቀጥ” ዛየዳ። ይትኼጅዛሉ ኢዶቻች ሃጀሌ ሀቢ-ባያች (activists) ባሎት ኩተቤ፤ ይ ኮሮና ነዙ ወቅቲ፤ ኢንዶቻችቤ ህንቅርቲ ላይቤ አንገት አቅነእ ኻነቤዩ። ዝቃም መትሩሃሀቅ (physical distancing) ኹንቲም፤ መትወቀጥ ዩቡርዲበዩ ኢንዶቻቹው ሱትሪ-ጋር (ሼልተር) ሞሰድሌ አልአሜቻም። ሰበብዞም ቃጪቤ ኡሱእ መዴጀመ ሱትሪ-ጋርቤ ዛላችበህ መላቀጥ ወቅቲዞ አፌት መቄረህቲ ቃኑንበህ ይሊጡሜልመ።
አኸእ ያም አሀድ ሀረቄው ሚይ ሰችኺ ኢላሌ ስልኪ ቅር ኣሽኹሎ። ሰላመት ሉኽ ሁሉፍ ኢስአታሽነ ቤሄር፤ ጋርቤ መድለግ፡ ወልዳችበህ መዋላው ወር ኡሽ በል ባኾ።
“ምን መዋለ ትለሀኽ። መትፎካ፤ መትሀሻ፤ ኡሩስ ፍልጣ፤ ዶኻ ሞኽና ብላይ መዋለ አተላ።”
ይው ዛዬኝ ሳሂቤ 10 አመትቤ ያንሱዛሉ 4 ወልዳች ኣውን ታ።
“ማኽ?” ባኾ።
“አሀድ ገረብ ደሌ ደርሲ አትቲሸዮሆኽ። አላይ ገረብ ደሌ ሂደግ ዋ ሂጀጊ፡ ሀል። ድላጌውን ነድለግ ሞ አዚያቹው ድላጋ ኑሽ? ዶኻ ኻንኹ” ባዬኝ።
“ኣይ ሃጂየኻኽ ኤልቲሚ?” ባኾ።
“ሐልቲት” ባዬኝ።
“ትለህዲበኹሜቲ?” ባኾ።
“አኻኽ ዛልኺሌ መስመእ አበሉኝ ትላት።”
“ቤቀድ ይሰሜን ናር?”
“መድረሳ ታስቲመ ተገበዩዛት አዝዜን ናርቲ። መድረሰቤ መትፌቀርቤ ይደልገዩመ ይገቡን ናር። አኸእ ጋር ኡስጡቤ ዩላሉመ ዝትሃፈና ሁምናው ኣይ ኩተቤ የንዲዶ። አትጢቤ አጥጢ መትኒጫጨህ ዋ መትጪራረቅ……ኣኑም ሂደግ ዋ ሂጀጊ…. ይ ላይቤ ኣይ ሃጂያች ሱምሚ አርራቱዉም አትሪሰእዋ …..ዋቴ ይ ቤት ሀልኹ ኢለኻኽ።” ባዬኝ።
መትኼተልቤም “ዛልኹቦ ሃለቱው ያረኽ ዩኹናልወ አሀድ ቪዲዮ ሙሱስ ብልጭቲው ኢገፍሪለኻኽወ ሄጃ።” ባዬኝመ ይው ገፈረሌኝ።
Video clip (attached).
ይ ቪዲዮ ሙሱሱው ዝሪእኹ ሰአ ሼኽ ጉግሉው አጎገልኾ። ጋር-ዋልነት በህ ዝትላሀዳ ጋር ኡስጡ ሀውከር ኸርኸራው ገበእ በለኝ ባኾ። እስበልበላት ባዳች
ዛጡው ጉግል አመሰረሌኝ። ኢስበልበላት ባድቤ ዝትወቀጣች ዋ መሞታ አለፍ ዝዋፈቄያቹው ድረደሬው። ካናዳው አዴጅ ባኾ። አፕሪል 1 ቤ ኢላ ሜይ 4ቤ ጋር ኡስጡ ሀውከርቤ 9 ኡሱእ ሩህ ተብላሸ። ኡሱእ ሩህ ዘትቢላሻች ጉቲቤም 3 ዚዩ ሩህዚዩው አጠፈኡ ይላል ጉግል። ህልቂዞ ትሞይ ሞይ ይትኒዋወጣል። አደድዞው ኣውዞ ዋ ጋርዞመጥ ዩቃ።
ዝትጋደላው የትካፍሊም፤ ዝሞታው ይቀብሪም ዝገደደቤው ወቅቲቤን ታ ዛልኔው። ሂራር ጠለፌኝ ማን ታ፤ ሶመን አማጀቤኝ ማንታ ያጩሜል። ሀዬ ሀዬ ኢጂ ዘግ ባይቲ አመል ዛልበኹ አቦቻች ኢጂኾው ሳምቱ። አፍ-ክብሪት ኢንዶቻቹም ኢሳት ትጪህሪ አርራትኾው ኩዋረንቲን ኤስቤ።
አቦች ኢንዶችዚናሌም አደብ የስጠና። ሼይጣኑው የልሀድበና። ባድ የቦርደና። ሌይለቱል ቀድሪው፤ ሱዋብዞማኽ ኩም ወህሪ ኢባዳው ይዋፍቀና ኩታ ቁርኣንዚናው፤ ዱዋእዚናው፤ ሰደቃዚናው፤ ኢባደዚናው መክመልሌ ወቅቲዚናው ኼይሪሌ ነዊላ ኩታ ጎይታ ሂዳየዞው የስጠና ባይቲቤ ስናኔው አቁፍላኽ።
ደድበህ
አብዱረሂም ሃሺም።