ጎይታ የሄግኒለና
ሀያት፡ መዴጀበህ፤ ሙት፡ መሌጠበህ ይትገለጥዛል ኹንቲን ታ። ሀያት፤ ኢታ ዱኚት ኩፎኝ ይዲጁቦመ የፈጅዛል ንብሪ ዝኻና ሰአ፤ ሙት ሞኽ፡ ክም ዘይቲፈጅ ኣኺራ ይጋዝቦ ሩኹብትን ታ። ይ ዴጆት ዋ ሌጦቱው መትቄበል ዝኢማንዚና አሳስ ዝታሌ ንትቄበለሀና። ኩልሉ ነፍሲን ዛኢቀቱል ሞውቲን ታመ።
ማጥ ኩፎኝ ምንሌ ኒዲጃና? ምንሌኽ ንጋዛና (ንሊጣና)? ኢታ አታይቤ ቀልቢ ዛለ ቀልቢ ሞሻ ዛልባ፤ አሀድ አልላሁ ቂጥጤ አሀድዚናዉም ሰበብ ብላይ አልኸለቄናም። ኢታ ዱኚትቤ አሀድ ኦር ሺኢ ንዘሪ፤ ነበቅሊ፤ ኑቁጭመ ነገቢ ኩታን ታ። ንገባዛናም፤ ነገባዛናም እስሁሉ ጋር ኣኺራን ታ።
ሜይ 31 2020 ሞይ ኡስታድዚና ሼኽ አህመድ አብዱላሂ ሙትቤ ተላዩና። ሼኽ አህመዱው አሀድ ገረብዚና ቁርረቤ ኑቀዮሆና። አላይ ገረባቹም ሩሁቅቤ ኑቀዮሆና። ሼኽ አህመድ ኣው ናሩ፡ ኡስታድ ናሩ። ኡሱእዚዩው፤ ባድዚዩው ትእቤ ዩዱዛሉ ሀቀኛ ባድ ወልዲ ወዩኽ ሙሉህ ሲቲዝንን ናሩ።
ሼኽ አህመድ አብዱላሂ ዊጅነትቤ ኢቆት ሪኻብሌ አስሊ ኢድዳ ዝታ መራው ዝመሰላ ቃም ሲኢጃ ቅባጭ አለፍ ዋፈቄዩ። ኢስታዞም ንርዛናችቤ ዛይድ መራ፡ ንሰምዛናችቤ ዛይድ መስመእ፡ መቤጃ ፍራኮት ናሬዩ። ሀንጉልላ ብርና ዝቀልቢ ቂናአ ዚኢማን ዝቅቲ ዝናሬዩ ኢሾታም ከቢርን ናሩ።
ሼኽ አህመድቤ ንርበዩ ዝናር ኢህሳን ዋ አኽላቅ፡ ዝናሬዩ በሐር ኢቆት፡ አርደዊጃችዚዩ ይለምዱ፤ ዩቁ ዋ የሪምጡ ኩታ ፈህኒቤ ዋ ኦር ኔትቤ መትሌመድ ፍራኮትዚዩ ቀልቢ ይማርኺ ዛልን ናር። ዝኡስጡ ዋ ዝቃጪ ቆርዚዩ፡ ዛለዩ ዱፍፉን ኢልሚው መስጠሌ ዘልቤኽሉ፡ ጢት ዋ ጊዲርበህ መትጣወር ይፈርኩዛሉ፡ ፈሲህ አርራት ዝናሬይ፤ መትፌቀር ዩቅዛሉ፡ ምንሌመጥ አዝዚዩ ኩታ አልኻንኹ የቲሽዛሉ ኦር መህዲጃን ናሩ። ሁልሉ ሁልሉቤ ሼኽ አህመድ ጉዶር ኡምሪ የርኸቡማም ጢት ግዲር ዝናም ዘልጠፍነቤዩ ዝትላዩና ኡስታድዝናን ናሩ።
ይ ዝታሌምን ታ ሙትዚዩ ኦርኩት ዘትሄጬና። ይሌምን ታ ቀልቢዚና ቱልኩፍ ዛቲ። ሼኽ አህመዱው ዝመሰላ ዓልም መቅበጥ ከቢራች ጌይቤ የትኺትላዛል ቅብላን፤ ይቀድዳዛል ጬር ጢት አልታም። ኦርኩትዞም ዓልማች ጠቢቅቤ ይትኸሹቦ ወቅቲቢ መሞተዚዩን ታ ኡ ኡ ዝናው ዘዛየዴው። ትእዝናቤ ዝበክኔው ሰበብ ብላዩም አልታ።
ኢስታዞም ላክን አሀድ ሺኢቤ ተስ ይለና የትኺሻል። ሼኽ አህመዱው ዝመሰላ ኦር መህዲጃ ዓልሙው ዝሰጤና ጎይታ ምን አትቄረቤና ? ዛነመ ሩህዚናው ዘትሄበርና ሰአ አሀዱም ባይቲመ “ ኢና ልላሂ ወ ኢንና ኢሌይሂ ራጂኡውን” ባይቲቤ ሩህዚናው ሙራጀአ ሞሸ ይነብሪበና ሀል። ይስጢም ይነሱም አዝዞን ታመ። ሼኽ አህመድ ዝነበሮ ሀያቱው ተፈኩር ኢንቤ ዘጋረድና ሰእ ፋይዳ ኣሹመ መሌጠዚዩው መትቀበርዚዩ ዝትከመለቤው ናሙስ ኹንቲ የቀናል። ኡሱእ ጋርቤ ይትኸተትባ ኮሮና ወቅቲቤ፤ ይ ኮድቭ-19 ነዙው ዘልፈራቤ ኡመት ጅናኢዝዚዩው መሼኛዞ፤ ጊዲር ያምቤ መሞተዚዩ ዋ ባድዚዩቤ መትቀበርዚዩ ሰሚቤም መትወደድዚዩው ያራል። ሰበብዞም ሰሚቤ ዝትወደዳ ደቺቢመ ይትወደዳልመ።
አኸእ እኛቤ ይትኤቀብዛል ምን ታ ኢሳነ ግር ፤ ፋጩቦ ዘይቀብጡቦ ጎይታ፤ ባድዚና ኢልሚቤ ዘትግር ኩታ አሀድ አልላሁው መጦቀስ። ሼኽ አህመድ አርደዊጃች አዝዚዩ ሀርዳው ይትኼተሉመ ይዲጅ ጂሉው የለምዱሉና ኩታ አርደዊጃችዚዩሌ የትኺሸዩ ከበከባው ሞሻት ታ።ሼኽ አህመዱው አልላሁ መርሂም ንልባ
አላይ ኡጋ ኤሉም። ይው ናሻዛናም ኪታባች መቅረብ፡ ኮምፕዩተር መቅረብ፡ ወልዳቹው አሺር ጋር መግፈር ዋ የትሊምዱ ከቢራችሌ ኡጅረዚዩው መክፈል ቤት ታ። ቆርራም ምህራ ዛላ ቃምቤ ሞተ ገራም ድላገዞ ዋ ሱምዞ ዩሙቱሜል።
ሼኽ አህመድሌ 8 ጀነቱው እኛሌም ረህመቱው አሀድ አላላሁ የስጠና። ኣሚን።
አማን ኹኑ
አብዱረሂም ሃሽም (ቶሮንቶ)
ሰበብ ብላይ አልዲጅናም። ሰበብ ብላዩም ንጋዙሜና። አመንቲዝና የቀነናዛል ይን ታ።